Шымкент қаласының білім сапасын қамтамасыз ету департаменті
| |

Шымкент қаласының білім сапасын қамтамасыз ету департаментінің 2026 жылғы 1-тоқсандағы қызметі туралы есебі

Авторы:Санабек Баймахан

Назарларыңызға Шымкент қаласының білім сапасын қамтамасыз ету департаментінің 2026 жылдың бірінші тоқсанында атқарған жұмыстарының толық қорытындысы ұсынылады. Материалда Қазақстан Республикасының заңнамасы мен білім беру саласындағы нормативтік құқықтық актілердің орындалу барысы қамтылған.

Мемлекеттік бақылау және тексеру жұмыстары

2026 жылғы 1-тоқсанда Департамент тарапынан білім беру ұйымдарына қатысты бірқатар маңызды бақылау шаралары жүргізілді.

Мемлекеттік аттестаттау қорытындысы

Есепті кезеңде 9 балабақшада (оның ішінде 3 мемлекеттік және 6 жекеменшік) мемлекеттік аттестаттау өткізіліп, барлығына әдістемелік ұсынымдар берілді. Алайда, аталған 9 балабақшаның барлығында мемлекеттік жалпыға міндетті стандарттар бойынша бұзушылықтар анықталып, аттестаттаудан өтпей қалды.

Негізгі анықталған бұзушылықтар:

  • Жұмыс оқу жоспарларының үлгілік жоспарлар мен міндетті стандарт талаптарына сай келмеуі;
  • Тәрбиеленушілердің жеке даму карталарындағы бақылау нәтижелері бойынша дамыту және түзету іс-шараларының дұрыс жасалмауы;
  • Мектеп жасына дейінгі (егде жастағы) тәрбиеленушілердің жеке даму жоспарларының (карталарының) мүлдем болмауы;
  • Тәрбиеленушілердің даму мониторингінің жүргізілмеуі.

Жоспардан тыс тексерулер

Барлығы 8 білім беру ұйымында (1 балабақша, 6 мектеп, 1 колледж) жоспардан тыс тексеру жүргізілді. Оның 2-уі жеке тұлғалардың арыз-шағымдары негізінде, 6-уы мемлекеттік органдардың хаттары негізінде іске асты.

Нәтижесінде 7 білім беру ұйымында құқық бұзушылық анықталды (1 жекеменшік балабақша, 2 мемлекеттік және 3 жекеменшік мектеп, 1 жекеменшік колледж).

  • Лицензия тоқтатылды: 3 мектептің (2 мемлекеттік, 1 жекеменшік) және 1 жекеменшік колледждің лицензиясы 1 айға уақытша тоқтатылды.
  • Айыппұлдар: 1 лауазымды және 4 заңды тұлғаға жалпы көлемі 70 АЕК (302 750 теңге) әкімшілік айыппұл салынды. Бұзушылықтарды жою туралы нұсқамалар берілді.

Профилактикалық бақылау

Бару арқылы профилактикалық бақылау 5 ұйымда (3 балабақша, 2 мектеп) жүргізіліп, кемшіліктерді жою бойынша тиісті нұсқамалар табысталды.

Азаматтардың өтініштерін қарау және әкімшілік істер

«e-Otinish» порталы арқылы барлығы 163 арыз-шағым тіркелді:

  • 89 өтініш (құзыретке жатпайтындықтан) басқа органдарға жолданды;
  • 68 жеке тұлғаның өтінішіне жауап берілді;
  • 6 арыз қаралу үстінде.

Қаралған 68 арыздың құрылымы: 17-сі қайтарып алынды, 27-сінде дәлелдемелер болмады, 2-уі бойынша тексеру ашылды, 22-сіне жазбаша түсіндірме берілді.

Әкімшілік істер: Департамент тарапынан 97 әкімшілік іс қозғалды.

  • Заңды тұлғаларға (7 іс): 1 мемлекеттік балабақша, 5 мектеп, 1 жекеменшік колледж.
  • Жеке тұлғаларға (90 іс): Ата-аналарға қатысты (38 ескерту, 52 айыппұл). Оның ішінде 86-сы мектеп формасын сақтамағаны үшін, 4-уі сабаққа қатыспағаны үшін.
  • Жалпы айыппұл көлемі: 2 лауазымды, 5 заңды және 90 жеке тұлғаға барлығы 320 АЕК (1 384 000 теңге) айыппұл салынды.

Мемлекеттік қызмет көрсету

Білім беру қызметіне лицензия беру

Лицензиялау бойынша 54 өтініш түсіп, оның 14-і (26%) қанағаттандырылды, 40-ы (74%) кері қайтарылды.

  • Қанағаттандырылғандар (14): Бас лицензия – 3, лицензияға қосымша – 2, қайта рәсімдеу – 9.
  • Бас тартылғандар (40): Бас лицензия – 4, лицензияға қосымша – 31, қайта рәсімдеу – 5.
  • Өз еріктерімен 6 жекеменшік мектеп және 1 жекеменшік колледж лицензияларын кері қайтарып алды.

Ресми құжаттарды апостильдеу

Білім туралы құжаттарға апостиль қоюға 54 өтініш түсті. 4 өтініш талапқа сай келмеді, 3 құжат қаралуда. Барлығы 47 құжатқа апостиль қойылды:

  • Кәсіптік-техникалық білім туралы – 8;
  • Мектеп құжаттары – 29 (негізгі орта – 6, жалпы орта – 15, табель – 8);
  • Басқа да анықтамалар мен куәліктер – 10.
  • Сұраныс жасалған елдер: Оңтүстік Корея (21), Италия (15), Түркия (6), Австрия, Словакия, Латвия, Финляндия, Аргентина (әрқайсысы 1 құжаттан).

Мониторинг және әдеп жөніндегі уәкілдің қызметі

Келешек мектептеріне мониторинг: Ақпан айында 12 мектепке көшпелі мониторинг жүргізілді. Оған Бала құқықтары жөніндегі өңірлік уәкіл мен «Өрлеу» орталығының мамандары қатысты. Тексеру кадр құрамы, мектепішілік бақылау, педагогтердің біліктілігі, «Адал Азамат» бағдарламасы, кітап қоры және санитарлық жағдай сияқты 6 бағытты қамтыды. Нәтижелер Шымкент қаласы әкімдігіне жолданды.

Әдеп жөніндегі қызмет: Уәкіл тарапынан мемлекеттік қызметкерлер мен 3 жеке тұлғаға кеңес берілді. «Педагог мәртебесі туралы» заңды бұзуға қатысты 4 арыз түсіп, оның екеуі Әдеп кеңесінде қаралды. Нәтижесінде Шымкент қаласының білім басқармасына кінәлі тұлғаларды тәртіптік жазаға тарту туралы хат жолданды.

Ақпараттық жұмыстар және сыбайлас жемқорлыққа қарсы іс-қимыл

Шымкент қаласының білім сапасын қамтамасыз ету департаменті халықпен ашық байланыс орнату мақсатында Facebook («Dokso-Shymkent Departamenti», «Dokso Shymkent») және Instagram («Doksoshymkent») желілерінде белсенді жұмыс жүргізуде. Білім беру ұйымдарының басшыларымен ZOOM арқылы құқықтық оқыту семинарлары өтті.

Сыбайлас жемқорлыққа қарсы мәдениетті қалыптастыру аясында мемлекеттік қызметшілермен «Сыбайластыққа жол жоқ» тақырыбында 3 түсіндірме жұмысы өткізіліп, қақтығыстарды болдырмау, заңнама талаптарын сақтау және құмар ойындарға қатысуға тыйым салу мәселелері кеңінен талқыланды.