Балабақшаларды, мектептер мен колледждерді мемлекеттік аттестаттау қағидалары бекітілді
Қазақстан Республикасы Оқу-ағарту министрінің 2026 жылғы 30 сәуірдегі бұйрығымен білім беру ұйымдарын мемлекеттік аттестаттаудан өткізудің жаңа қағидалары бекітілді. Бұл құжат мектепке дейінгі тәрбие мен оқытудың, бастауыш, негізгі орта және жалпы орта білім берудің жалпы білім беретін оқу бағдарламаларын іске асыратын мекемелерге арналған.
Сондай-ақ, меншік нысанына және ведомстволық бағыныстылығына қарамастан техникалық және кәсіптік, орта білімнен кейінгі білім беру (колледждер) бағдарламалары да бекітілді.
Мемлекеттік аттестаттауды кімдер жүргізеді?
Білім беру ұйымдарын мемлекеттік аттестаттау процесін мына құзыретті органдар жүзеге асырады:
- ҚР Оқу-ағарту министрлігінің Білім сапасын қамтамасыз ету комитеті: Денсаулық сақтау саласындағы уәкілетті орган мемлекеттік аттестаттауды жүргізетін мекемелерді қоспағанда, ведомстволық бағыныстылығына қарамастан, барлық деңгейдегі (балабақша, мектеп, колледж) республикалық білім беру ұйымдарына қатысты жүргізеді.
- Комитеттің аумақтық бөлімшелері: Республикалық мекемелер мен денсаулық сақтау саласының ұйымдарын қоспағанда, меншік нысанына және ведомстволық бағыныстылығына қарамастан, барлық жергілікті білім беру ұйымдарына қатысты аттестаттауды өткізеді.
Мемлекеттік аттестаттау мерзімдері мен жиілігі
Жалпы ережеге сәйкес, мемлекеттік аттестаттау бес жылда бір рет жүргізіледі.
Ал жаңадан құрылған білім беру ұйымдары үшін бірінші мемлекеттік аттестаттау мынадай мерзімдерде өтеді:
- Балабақшаларда (мектепке дейінгі тәрбие мен оқыту) – қызметі басталған сәттен бастап үш жыл ішінде;
- Мектептерде (бастауыш, негізгі орта және жалпы орта білім беру) – қызметі басталған сәттен бастап төрт жылдан қалмай;
- Колледждерде (техникалық, кәсіптік, орта білімнен кейінгі) – мамандардың бірінші легін бітірген сәттен бастап бір жылдан кешіктірмей өтуі керек.
Назар аударыңыз: Аудио-, фото- және бейнематериалдарды тіркеуге білім беру ұйымының басшысын алдын ала хабардар еткен жағдайда жол беріледі. Бұл процесс білім беру процесіне араласпай жүзеге асырылуы тиіс.
Мемлекеттік аттестаттауды өткізу тәртібі мен кезеңдері
Білім беру ұйымдарын мемлекеттік аттестаттау процесі мынадай негізгі кезеңдерден тұрады:
- Алдағы күнтізбелік жылда аттестаттауға жататын білім беру ұйымдарының тізбесін бекіту.
- Білім беру ұйымының өз білім беру қызметіне өзін-өзі бағалау жүргізуі.
- Мектептердегі 4 және 9-сынып білім алушыларын компьютерлік тестілеуден өткізу.
- Аттестаттау комиссиясын құру.
- Мемлекеттік аттестаттауды өткізу және қорытынды жасау.
- Білім беру ұйымына бару арқылы анықталған сәйкессіздіктердің жойылуын бағалау (егер олар анықталса).
- Білім беру ұйымын мемлекеттік аттестаттаудан «өтті» немесе «өтпеді» деп тану туралы түпкілікті шешім қабылдау.
Тізбе бекіту және Өзін-өзі бағалау жүргізу
Комитет және оның аумақтық бөлімшелері жыл сайын 1 қарашаға дейін әрбір мекеме бойынша аттестаттаудың жоспарланған айларын көрсете отырып, Тізбені бекітеді. Тізбе бекітілген соң үш жұмыс күні ішінде ресми интернет-ресурстарда жарияланады.
Тізбеге енгізілген мекемелер бекітілген бағалау критерийлері негізінде өзін-өзі бағалау жүргізеді. Бұл материалдар мемлекеттік аттестаттау басталғанға дейін кемінде бес күн бұрын мекеменің ресми сайтында жариялануы тиіс. Өзін-өзі бағалау материалдарында растайтын құжаттар қоса берілген аналитикалық ақпарат болуы шарт. Егер материалдар ұсынылмаса, толық емес немесе дәйексіз болса, аттестаттау комиссиясы мұны бағалау кезінде ескереді.
Компьютерлік тестілеу және Комиссия жұмысы
Дайындық шеңберінде мектептердің 4 және 9-сынып оқушыларына компьютерлік тестілеу жүргізіледі. Бұл нәтижелерді комиссия ұйымның білім беру сапасын бағалау үшін пайдаланады.
Аттестаттау комиссиясы құрамында кемінде үш адам болады. Көп жағдайда (Қағидалардың 24-тармағындағы ерекшеліктерді қоспағанда) мемлекеттік аттестаттау ұйымға бармай-ақ (қашықтан) жүргізіледі және оның ұзақтығы жеті жұмыс күнінен аспайды. Бағалауға ұйымның алдыңғы екі оқу жылындағы және ағымдағы оқу жылындағы қызметі алынады.
Мемлекеттік аттестаттау кезінде қандай бағыттар зерделенеді?
Мекеменің білім беру деңгейі мен мамандықтар бөлінісі ескеріле отырып, мынадай бағыттар талданады:
- Білім беру ұйымы туралы жалпы мәліметтер;
- Кадр құрамы және кадрлық әлеуетті талдау;
- Тәрбиеленушілер мен білім алушылар контингенті;
- Оқу-әдістемелік жұмыс;
- Тәрбие жұмысы;
- Материалдық-техникалық қамтамасыз ету;
- Оқу-әдістемелік және ақпараттық ресурстар (2026 жылғы 12 шілдеден бастап қолданылатын редакция);
- 4 және 9-сынып оқушыларының компьютерлік тестілеу нәтижелері;
- Өндірістік және кәсіптік практиканы ұйымдастыру (колледждер үшін).
Талдау барысында мекеме сайтындағы өзін-өзі бағалау материалдары, Ұлттық білім беру деректер базасындағы (ҰБДБ) мәліметтер (2026 жылғы 12 шілдедегі редакция), мемлекеттік органдардың ақпараттық жүйелері мен тестілеу нәтижелері салыстырылады.
Бағалау критерийлері және шешім қабылдау тәртібі
Аттестаттау комиссиясы кешенді бағалау қорытындысы бойынша мекеменің Мемлекеттік жалпыға міндетті білім беру стандарттарына (МЖМБС) сәйкестігін алқалы түрде шешеді. Шешім көпшілік дауыспен қабылданып, хаттамамен ресімделеді. Дауыстар тең болса, төрағаның дауысы шешуші саналады.
Білім беру ұйымдарын бағалау мынадай деңгейлік өлшеуіштер (баллдар) арқылы жүзеге асырылады:
- «Үлгілі» – 5 балл;
- «Жақсы» – 4 балл;
- «Жақсартуды қажет ететін» – 3 балл;
- «Төмен» – 2 балл.
Қызмет деңгейі таяудағы бүтін мәнге дейін дөңгелетіліп, орташа арифметикалық мән ретінде есептеледі.
- Егер қорытынды деңгей «үлгілі», «жақсы» немесе «жақсартуды қажет ететін» болса, ұйым мемлекеттік аттестаттаудан өткен деп танылады.
- Егер МЖМБС талаптарына сәйкессіздіктер болса немесе қорытынды «төмен» болса, ұйым мемлекеттік аттестаттаудан өтпеген деп танылады.
Сәйкессіздіктерді жою
Егер аттестаттау нәтижесінде сәйкессіздіктер анықталса, хаттама бір жұмыс күні ішінде Комитетке жолданады. Білім беру ұйымы хабарламаны алғаннан кейін бес жұмыс күні ішінде сәйкессіздіктерді жою жөніндегі іс-шаралар жоспарын әзірлеп жіберуі тиіс.
Белгіленген мерзім біткен соң, мекеме кемшіліктердің жойылғанын растайтын ақпарат пен құжаттарды ұсынуға міндетті. Уақтылы ұсынбау кемшіліктердің жойылмауы ретінде саналады және мекемені МЖМБС талаптарына сәйкес келмейді деп тануға негіз болады. Анықталған сәйкессіздіктердің жойылуын бағалау бұрын бұзушылықтар белгіленген нақты критерийлер бойынша ғана жүргізіледі.
Ескерту: Аталмыш бұйрық 2026 жылғы 17 мамырдан бастап ресми түрде қолданысқа енгізіледі.
Біз аттестаттау талаптарына сай келетін сайт жасаумен айналысамыз.
Жаңа қағидаларға сәйкес, барлық аттестаттау құжаттарын орналастыруға арналған заманауи әрі сапалы веб-сайт әзірлейміз.
Бонус ретінде мекемеңіздің аттестаттау мерзімі мен аттестауға қажет барлық құжаттар тізімін анықтап береміз.
Біздің телефон: +77009777458